Die weermag wou nie Maandag "bespiegel" oor die name van senior bestuurslui wat moontlik op die lys van dertig amptenare is wat na bewering voorkeurmotortransaksies weens hul betrokkenheid by die wapenpakkette van R43 miljard sou gekry het nie.

Volgens maj. Louis Kirstein, woordvoerder van die weermag, het hy meer besonderhede as net die vanne op die lys nodig om te kan bevestig of hulle inderdaad aan die weermag verbonde is.

The Star het Maandag dié lys gepubliseer waarvolgens van die mense "buitensporige" afslag sou kry op motors aangekoop deur European Aeronautic Defence and Space (EADS).

Mnr. Michael Woerfel, besturende direkteur van EADS, was glo die bemiddelaar in die afslagaanbiedings.

Afgesien van die twee Mercedes-Benz (MB)-motors van mnr. Tony Yengeni, hoofsweep van die ANC, wat hy en sy vrou op dié manier sou kry, en genl. Siphiwe Nyanda, hoof van die weermag, wat ook twee motors só aangekoop het, verskyn die volgende vanne:

 Msomi (onderskeidelik 'n MB en 'n Colt-bakkie)

 Sexwale (Chrysler Voyager)

 Kunene (mnr. Zoli Kunene van die Kunene-groep van maatskappye - twee MB's en 'n Colt-bakkie)

 Swan (mnr. Llew Swan, voormalige uitvoerende hoofbeampte van Krygkor)

 Pillay (mnr. Vanan Pillay van die departement van handel en nywerheid en betrokke by die onderhandelinge oor die teenhandeltransaksies)

 Ncumani (MB ML270CDI)

 Erasmus (MB C240A)

 Woerfel (4 MB-voertuie vir onbekende kopers)

 Ngema (Honda Ballade 150)

 Tulwana (MB C180M)

 Foster (MB ML270)

 Kavidi (me. Wivine Ndlandu Kavidi, vrou van die voormalige Zaïrese eerste minister, mnr. N'Guza Karl-I-Bond en vriendin van Yengeni)

 Young (MB CL500A)

 Beukes (onderskeidelik 'n MB E240A en 'n MB C240A)

 Smit (MB C200KA)

 Verwey (MB C180A)

 Pretorius (MB C270 CDI A)

 Nqose (MB C240A)

 Macquebela (MB S500A)

With acknowledgement to Erika Gibson and Beeld.