Johannesburg – Verskeie optredes die afgelope twee weke deur die nasionale vervolgingsgesag se ondersoekspan na beweerde ongerymdhede in die R43 miljard-wapentransaksies het daarop gedui dat die net nouer om die verdagtes begin span. 

Na gister se beslagleggings in Durban, Mauritius en Frankryk het die nasionale vervolgingsgesag benadruk dat net op die dokumente beslag gelê is wat verband hou met die wapens en dat die betrokke maatksappye nie verdink word nie. 

Mnr. Schabir Shaikh is die uitvoerende hoof van die Nkobi-groep. Nkobi het verskeie sakebelange in onder meer Thomson CSF, ‘n Franse wapenmaatskappy, en die regeringskontrak vir die verskaffing van die nuwe rybewyskaarte. 

Verskeie bewerings is reeds gemaak dat Shaikh sy noue verbintenis met senior ANC-lede gebruik om sekere kontrakte te beding. 

Hy is ook ‘n direkteur van African Defence Systems (ADS), die Suid-Afrikaanse maatksappy wat die omstrede kontrak vir die verskaffing van gevegsuites vir die nuwe korvette bekom het. 

Nadat dié kontrak toegeken is, het Thomson die meerderheid van die aandele in ADS verkry. Kantore van Thomson se houermaatskappy, Thales International, in Frankryk en Mauritius, sowel as die huise van sy Suider-Afrikaanse tak se besturende direkteur, mnr Alain Thetard, is gister oggend in dié lande deurgesoek. 

Mnr Chippy Shaikh, hoofwapenaanskaffer vir die weermag en broer van Schabir, het in die openbare aanhore onder skoot gekom oor sy beweerde botsende belange. Hy het ADS na bewering begunstig in die toekenning van die gevegsuite-kontrak. 

Mnr Chippy Shaikh het beweer dat hy hom aan vergaderings onttrek het wanneer dié kontrakte bespreek is. 

Hy is langer as 12 dae deur die ondersoekspanne ondervra. 

Die beslaglegging het ook verband gehou met Futuristic Business Solutions (FBS). 

Van FBS se direkteure is verwant aan mnr Joe Modise, voormalige minister van verdediging. 

Van die kontrakteurs in die transaksies moes na bewering onder druk teenhandel-ooreenkomste met FBS aangaan, in ruil vir kontrakte. 

Mnr Ian Pierce, direkteur en rekenmeester van FBS, is meer as ‘n week gelede in hegtenis geneem nadat hy vroeër ondervra is. 

Hy is gedagvaar om die oorspronklike dokumente in te lewer, maar is in hegtenis geneem toe hy versuim het om dit te doen. 

Met erkenning aan Erika Gibson, Die Burger en News24.