Kaapstad. Die ANC-lede van die staande komitee vir open bare rekenings (Skoor) het klaarblyklik geswig voor die druk van die uitvoerende gesag oor die komitee se hantering van die ondersoek na die wapenpakket-debakel. 

Die ANC-lede van Skoor teken in 'n konsepverslag verskoning aan teenoor die uitvoerende gesag en kritiseer nie wat kommentators beskou as regstreekse inmenging en intimidasie van Skoor deur die uitvoerende gesag nie. 

Me. Patricia de Lille van die PAC het ook gister bevestig dat sy konstitusionele hof toe wil gaan oor pres. Thabo Mbeki se besluit om die Heath-eenheid uit te sluit van die ondersoek na korrupsie in die wapenpakket van R43,8 miljard. 

Volgens De Lille het die uitvoerende gesag se hantering van die ondersoek die land in 'n `grondwetlike krisis'' gedompel deurdat die uitvoerende gesag die ANC se meerderheid in die parlement misbruik. Sy het ook gister vir die eerste keer twee mense genoem met wie sy inligting oor beweerde ongerymdhede in die toekening van die wapenkontrakte uitgeruil het. 

Hulle is prof. Themba Sono, DA-LPW in Gauteng, en dr. Richard Young van die wapenfirma CCII Systems in Kaapstad. Young beoog ook 'n hofsaak teen die regering. 

Die ANC-lede van Skoor was gister nie bereid om 'n ``minderheidsverslag'' van die opposisiepartye in te sluit by Skoor se tweede verslag oor die wapenpakket-debakel nie. Skoor moet 'n tweede verslag aan die nasionale vergadering voorlê oor die verloop van sake sedert dié komitee in November verlede jaar 'n ondersoek na die wapenpakket aanbeveel het. 

In die verslag moet Skoor sy standpunt stel oor die uitsluiting van die Heath-eenheid uit die ondersoek en die aanvalle van adj.pres. Jacob Zuma en vier kabinetsministers op Skoor. 

Die ANC het 'n konsepverslag opgestel wat die IVP, die DA en die UDM gister verwerp het. Die ANC meen egter sy verslag moet as Skoor se verslag beskou word omdat die komitee ``gedrewe is deur die

meerderheidstandpunt'' soos vervat in die ANC-verslag, het mnr. Thabang Makwetla, voorsitter van die ANC-koukus, gesê. 

Voordat dié standpunt in gister se Skoor-vergadering gestel is, was die ANC se verklaarde posisie dat hy die opposisiepartye se standpunte sal insluit in sy verslag ``indien hulle die ANC daarvan kan oortuig''. 

Die ANC sê in sy verslag dat Skoor ``nooit bedoel het om die uitvoerende gesag van oneerlikheid of korrupsie te beskuldig nie. As dit so lyk, word dit betreur''. 

Volgens die ANC het dr. Gavin Woods, Skoor-voorsitter, sy versoek aan Mbeki vir die betrokkenheid van die Heath-eenheid gedoen sonder die insae van die res van die Skoor-lede. Die ANC steun ook min. Trevor Manuel se standpunt dat die wapenpakket R30,3 miljard kos en nie die markaangepaste R43,8 miljard nie. 

Die PAC wil met die hofsaak die regering se verantwoordbaarheid en deursigtigheid toets, het De Lille gesê. Die hofsaak kan uitsluitsel gee oor wat die status van die kontrakte is indien korrupsie bewys word. 

Young het gister gesê CCII Systems is eers deur die Suid-Afrikaanse vloot ge¨dentifiseer as die voorkeurverskaffer van die inligtingsbestuurstelsels vir die nuwe Duitse korvette, maar toe is die kontrak toegeken aan die maatskappy Detexis wat glo bande het met staatsamptenare.

Met erkenning aan Christi van der Westhuizen, Liezel de Lange, Die Beeld en News24.