Mnr. Michael Woerfel, besturende direkteur van European Aeronautic Defence and Space (EADS), die wapenverskaffer wat midde-in die wapenskandaal beland het weens beweerde motorafslag wat vir hooggeplaastes gereël is, is Donderdagaand uit sy pos geskors.

Die skorsing is volgens 'n woordvoerder van EADS deels omdat daar vir sy veiligheid gevrees word. 'n Radiostasie het gistermiddag al sy persoonlike kontakbesonderhede en telefoonnommers op die lug aan luisteraars verskaf om hul mening oor die kwessie aan hom oor te dra.

Me. Zeona Motshabi, woordvoerder van EADS, het gisteraand gesê Woerfel is nie afgedank nie.

"Hy is tot verdere kennisgewing geskors totdat die ondersoek na die bewerings in Suid-Afrika afgehandel is. Terselfdertyd wil EADS steeds sy volle samewerking met die ondersoekspan bevestig.

"Dieselfde geld Michael se beskikbaarheid om enige tyd deur die wapenondersoekers ondervra te word en verdere inligting te verskaf."

Volgens haar is die besluit deur EADS se korporatiewe hoofkantoor in München, Duitsland, geneem.

Woerfel was na bewering die middelman in die afslagmotordebakel deurdat hy aan betrokkenes in die wapenbedryf, in die politiek en in die weermag, spesiale afslag - in sommige gevalle glo selfs meer as 40% - verskaf het om motors by DaimlerChrysler SA te bekom. Dié maatskappy en EADS is sustermaatskappye.

Al die betrokkenes het tot dusver ontken dat die spesiale afslag enigiets te make gehad het met beïnvloeding om ten gunste van EADS te besluit in die aanloop tot die sluiting van die wapentransaksies.

With acknowledgement to Erika Gibson and News24.