Kaapstad - Met die ongewone stap om sowat R250 000 se koerantadvertensies te laat plaas om sy kant in die kwessie oor sy omstrede Mercedes-Benz en die ontvouende wapentransaksie te stel, het mnr. Tony Yengeni meer vrae laat ontstaan as wat hy beantwoord het, het opposisiepartye gister gesê.

Yengeni, ANC-hoofsweep in die Nasionale Vergadering, is uit verskeie oorde die kop gewas omdat hy nóú eers reageer ná twee jaar se bewerings en omdat hy nie eerder die geleentheid gebruik het om in 'n parlementêre ondersoek oop kaarte te speel nie.

Die advertensies word afgesluit met 'n kwalik bedekte dreigement dat as bewerings teen diegene wie se name saam met gerekende internasionale maatskappye en die regering in die wapenondersoek genoem word, nie bewys kan word nie, dié mense wat vir die "grootskaalse verwarring en 'n wilde spooksoektog" verantwoordelik is, "die volle verantwoordelikheid vir hul dade moet aanvaar".

Verskeie politieke partye het gister met talle vrae op dié advertensieveldtog gereageer. Die groot vraag is blykbaar wie die derduisende rande vir die plasing daarvan betaal het.

Mnr. Cassie Aucamp, AEB-leier, het in 'n verklaring gesê as Yengeni self die koste dra, was dié viertrekvoertuig uiteindelik geen winskoop nie. Luidens Yengeni se advertensie het hy iets meer as R230 000 vir die voertuig betaal, waarvan die kleinhandelprys na bewering sowat 314 000 is. As die advertensiegeld bygereken word, kan die finale koste (sonder rente) byna 'n halfmiljoen rand wees.

Aucamp het gesê as Yengeni self opgedok het, "is die betrokke motor die duurste kopie van sy lewe. As dit die regering sou wees, is daar 'n nuwe korrupsieskandaal op hande. As dit die ANC self is, moet die kiesers oordeel of hul belange só met goeie rentmeesterskap behartig is."

Mnr. Douglas Gibson, DA-hoofsweep, wat klagte oor Yengeni by die Parlement ingedien het, het in sy verklaring gesê Yengeni moet Suid-Afrika vertel wie vir die advertensie betaal het en dié voordeel aan die registrateur van ledebelang in die Parlement verklaar.

"Hy moet verduidelik waarom hy nie voor die Parlement se komitee oor etiek en ledebelange verskyn het nie.

"Hy minag na my mening steeds die Parlement en dié advertensie vergroot die probleem net," het Gibson gesê.

Yengeni het na die mediaberigte oor die skandaal verwys as "ongeëwenaar in die geskiedenis van heksejagtery" wat sy familie, sy party, die land en homself erg benadeel het.

"Die tyd het nou aangebreek dat ek reageer . . . Die onlangse onderhoud agter geslote deure met die personeel van die nasionale direkteur van openbare vervolging het meegehelp dat kwaadstokers kon gis en het ruimte geskep vir allerlei ongegronde beskuldigings en skimpe," lui die advertensie.

Yengeni verduidelik onder meer hy het nie 'n afslag van 47% op die aankoopprys van die viertrekvoertuig ontvang nie, maar wel sowat 26% as 'n bemarkingspoging vir die vervaardigers. Die voertuig was boonop beskadig.

With acknowledgement to Cobus Grobler and Die Burger.