Oudpres. Nelson Mandela het glo R2 miljoen aan adj.pres. Jacob Zuma gegee omdat hy bang was Zuma se geldelike probleme beïnvloed sy "ANC-pligte".

Só het mnr. Schabir Shaik, Zuma se finansiële raadgewer, gister in die Durbanse hooggeregshof getuig. Mnr. Johan van der Walt, forensiese ouditeur van KPMG, het vroeër getuig dat Mandela R2 miljoen in Zuma se bankrekening inbetaal het.

R1 miljoen daarvan is oorbetaal aan die Jacob Zuma Education Trust en R900 000 is deur Shaik oorgeplaas na die rekening van Floryn Investments, waarin Shaik 'n 100%-belang het. Van der Walt het aangevoer dat Shaik die R900 000 gebruik het om die skuld van sy sukkelende maatskappye te delg.

Shaik het gister die onbeantwoorde vraag - waarom Mandela die geld aan Zuma gegee het - beantwoord deur te getuig oor 'n vergadering in Johannesburg in 1998.

Mandela en mnr. Ismail Ayob, sy prokureur, het Shaik en Zuma glo ontbied om te vergader oor Zuma se skuld. Volgens Shaik was hy siek en het mnr. Anand Moodley, die Nkobi-groep se prokureur, Zuma vergesel.

"Mandela het gesê die geld sal hom in staat stel om al sy skuld uit te wis. Dit moes sy geldelike situasie verbeter," het Shaik getuig.

Volgens hom (Shaik) het Zuma gesê Mandela wou hom help om "terug op my voete te kom" en dat hy bekommerd was oor die uitwerking van Zuma se finansiële probleme op sy ANC-pligte.

Shaik het 'n staat van ál Zuma se las te opgestel en dit aan Moodley gestuur vir die Mandela-vergadering. Zuma se laste was toe reeds meer as R1 miljoen.

Shaik het egter nie uitgebrei oor die oorplasing van die Mandela-geld na die rekening van Floryn Investments nie.

Adv. François van Zyl, SC, Shaik se regsverteenwoordiger, het hom ook uitgevra oor 'n voorlegging aan Absa in 2001 toe Shaik en Zuma aansoek gedoen het om kliënte van Absa se private bank te word.

Die hof het vroeër getuienis gehoor dat 'n beweerde "leningsooreenkoms" tussen Shaik en Zuma nié deel was van Zuma se staat van bates en laste nie. Shaik het gister erken hy het die ooreenkoms uitgelaat "omdat ek dit nie gesien het as 'n las nie".

Hy't uitgebrei dat hy 'n "goeie prentjie" van Zuma aan Absa wou voorhou en hom nie in 'n slegte lig wou stel nie.

Met erkenning aan Adriaan Basson en die Beeld.