Publication: Die Volksblad Issued: Date: 2005-12-20 Reporter: Philip de Bruin Reporter: Reporter:

‘Jammerlike Dag as Zuma Suksesvol Eis’

 

Publication 

Die Volksblad
Date 2005-12-20

Reporter

Philip de Bruin

Web Link

www.news24.co.za

 

Johannesburg. – Dit sal ’n “jammerlike dag vir die Suid-Afrikaanse regspleging” wees as mnr. Jacob Zuma in sy korrupsieverhoor suksesvol “ ’n onherstelbare benadeling” kan eis weens die Nasionale Vervolgingsgesag (NVG) se “verwerplike” beslagleggings op dokumente van Zuma se prokureur.

Só sê adv. Brian Spilg, SC, van Johannesburg in die jongste uitgawe van Advocate, maandblad van die Algemene Balieraad van Suid-Afrika.

Spilg is een van die mees senior advokate in die land wat in belastingreg, insolvensiereg en handelsreg spesialiseer.

Hy dien in die Raad op Inkomstebelasting en die Raad op Veiligheidsbeheer.

Oor die Zuma-verhoor sê hy as die NVG se “skending van die privilegie tussen kliënt en prokureur” die NVG se saak sink, sal dit daarop neerkom dat ’n vervolging vou weens die aantasting van ’n basiese mensereg.

“Die optrede van die NVG is verwerplik, veral as ’n mens in gedagte hou hoeveel gekwalifiseerde regslui in die NVG betrokke is (by die Zuma- ondersoek).”

Desondanks, sê Spilg, het die NVG ’n benydenswaardige rekord van sukses en is dit ’n geïntegreerde spesialiseenheid wat weier om aan politieke druk toe te gee.

“Adv. Pikoli (Vusi Pikoli, nasionale hoof van vervolgings) is reg as hy sê niemand is bo die reg verhewe nie – selfs nie die Skerpioene nie.

“Hy moet geloof word vir sy openbare standpunt dat hy nie antwoorde verskuldig is op grond van openbare sentiment nie, maar net ingevolge die Grondwet.

“Desondanks moet die Skerpioene baie versigtig wees om binne die raamwerk van die Grondwet en die reg op te tree.

“Veral moet hulle nie gesien word dat hulle sensasioneel of wispelturig optree, of op ’n manier wat ’n verdagte in die openbaar verneder nie.”

Met erkenning aan Philip de Bruin en Die Volksblad.