Publication: Beeld Issued: Date: 2005-12-03 Reporter: Reporter: Reporter:

Kommissie in Frankryk Kyk na 10 Thales-Pakte

 

Publication 

Beeld
Date 2005-12-03

Web Link

www.news24.co.za

 

Die Franse vervolgingsgesag het 'n regterlike kommissie aangestel om wêreldwye bewerings van korrupsie teen die wapenreus Thales te ondersoek.

Die Franse dagblad Le Figaro het vandeesweek berig dat mnr. Yves Bot, Paryse prokureur-generaal, aangestel is om tien internasionale kontrakte wat aan Thales toegestaan is, te bekyk.

Thales word daarvan verdink dat hy omkoopgeld aan mnr. Jacob Zuma, afgedankte adjunkpresident, betaal het om hom te beskerm teen 'n wapenondersoek na ongerymdhede met Suid-Afrika se omstrede wapentransaksie.

Thint, Thales se Suid-Afrikaanse filiaal, word volgende jaar saam met Zuma van korrupsie aangekla.

Volgens Le Figaro kom die ondersoek nadat 'n voorlopige ondersoek voltooi is oor bewerings wat deur 'n voormalige Thales-amptenaar gemaak is.

Mnr. Michel Josserand, voormalige voorsitter van Thales Engineering and Consulting (THEC), het in September 'n storm ontke ten toe hy teenoor onthul het dat Thales jaarliks tot sowat R1,6 miljard aan omkoopgeld bestee.

Volgens Josserand bestaan daar 'n "gesentraliseerde omkoopfonds" waarvan net sekere hoë Thales-amptenare weet en wat gebruik word om veral toegang tot markte in Afrika te kry.

"Die ondersoekers het hul ondersoek 'n paar weke gelede afgesluit. Op grond van die uitslae het die vervolgingsgesag besluit op verdere ondersoeke ," lui Le Figaro se berig.

Bot se kommissie sal kyk na die omkoop van buitelandse agente, "aktiewe en passiewe korrupsie", die misbruik van staatsdienste en medepligtigheid met omkopery en bevoordeling.

Onder die tien kontrakte wat Bot sal bekyk, is fregatte wat aan Griekeland verkoop is; die veiligheid by verlede jaar se Olimpiese Spele in Athene waarvoor Thales toerusting verskaf het; en tegnologie wat verkoop is aan Kambodja, Marokko, Letland en Kameroen.

Daar kon nog nie vasgestel word of die Zuma-saak deel sal vorm van Bot se ondersoek nie.

Nóg bewerings wat teen Thales gemaak word, is dat hulle glo Europese Kommissie-subsidies misbruik het. Bot gaan ook Thales se skakeling met die Franse departement van verdediging bekyk.

Thales het alle korrupsie-bewerings teen hom ontken en gesê hy sal met die kommissie saam werk.

Met erkenning aan Beeld.