Durban. – “Ek is nou die slagoffer in Thabo Mbeki en Jacob Zuma se politieke geveg.”

Só het ’n gebroke Schabir Shaik gister gesê nadat die Durbanse hooggeregshof beslis het die staat is daarop geregtig om beslag te lê op Shaik se bates ter waarde van R34 miljoen.

Shaik het gister vir die eerste keer openhartig gepraat ná ’n marathon-regsproses waartydens hy aan korrupsie en bedrog skuldig bevind is, tot effektief 15 jaar tronkstraf gevonnis is en nou miljoene rande se bates verloor het.

Regter Hilary Squires, wat Shaik op 2 Junie verlede jaar op twee aanklagte van korrupsie en een van bedrog skuldig bevind het, het gister beslis Shaik se korrupte verhouding met Zuma was R34,3 miljoen werd en dat die staat op elke sent daarvan geregtig is.

Die uitspraak betrek ook die afgedankte adjunkpresident véél nouer by die Franse wapenfirma Thales se besluit om Shaik as sy bemagtigingsvennoot te aanvaar nadat hy die Nkobi-groep oorspronklik as vennoot uitgeskop het.

Squires het Shaik se argument, dat die hof bevind het Zuma se “ingryping” om Shaik as vennoot terug te kry was nie onwettig nie, verwerp en gesê Shaik verstaan sy uitspraak verkeerd.

Hy het in Junie slegs bevind die staat kon nie bewys dat Zuma ook in sy hoedanigheid as ANC-adjunkpresident ingegryp het toe hy met die base van Thales vergader het nie.

Squires gaan dan voort deur te beslis Shaik het self nie met sy betalings aan Zuma onderskei tussen Zuma se verskillende poste nie.

“Sy belegging was in die algehele politieke statuur van sy kliënt.”

Selfs al het die staat aangevoer dat Shaik die adjunkpresident van die ANC omgekoop het, sou dit steeds onwettig wees, “veral met inagneming . . . van die oorweldigende politieke beheer van landsake wat daardie party geniet”.

Shaik beskuldig Squires daarvan dat gister se uitspraak sy vorige een weerspreek.

“Eers het hy (Squires) bevind Zuma het niks verkeerds gedoen deur te praat met die Franse (Thales) nie. Nou verander hy sy besluit en bevind Zuma skuldig!

“Die regter vergeet ook dat die Franse eers (oudpres. Nelson) Mandela en (pres. Thabo) Mbeki se hulp gesoek het en tóé met Zuma gepraat het.” *1

Shaik glo hy het gronde om appèl aan te teken teen die beslagleggingsbevel en sal die appèlhof binnekort met ’n aansoek nader.

“Op ’n persoonlike vlak voel ek nou soos die slagoffer in Mbeki en Zuma se politieke geveg. Waarom word daar stilgebly oor die ander kontrakte in die wapentransaksie? Dit is nie waarvoor ons geveg het nie. Ek stem saam dat korrupsie uitgeroei moet word, maar doen dit dan op ’n oop en deursigtige wyse.”

Shaik het die beskuldigings van stoere Zuma-ondersteuners soos Cosatu, die ANC-jeugliga en die SAKP herhaal dat staatsliggame misbruik word om mense aan die “Zuma-kant te elimineer”.

“Dit is só verkeerd. Die boodskap wat uitgestuur word, is dat selfs die regbank vir politieke doeleindes misbruik kan word. My lewe gaan aan, maar hierdie boosheid moet stop *2.”

Shaik se appèlle teen sy skuldigbevindings word later vanjaar in die appèlhof aangehoor.

With acknowledgements Adriaan Basson and to Die Burger.