Publication: Beeld Issued: Date: 2006-09-27 Reporter: Adriaan Basson Reporter:

Zuma het Brief Net Onderteken, Nie Geskryf

 

Publication 

Beeld
Date 2006-09-27

Reporter

 Adriaan Basson

Web Link

 www.news24.com/Beeld

 

Bloemfontein. - Die staat het nog nooit beweer mnr. Jacob Zuma het die berugte Heath-brief aan die parlement se staande komitee vir openbare rekenings (Skoor) geskryf nie.

Hy het dit wel as hoof van regeringsake onderteken "en dít was die soort ding wat (die wapenfirma) Thint van hom verwag het om te doen".

Só het adv. Billy Downer, SC, namens die staat, gister in die appèlhof gesê in antwoord op 'n vraag van regter Lex Mpati, adjunkpresident van die hof, oor die waarde wat die staat aan dié brief heg.

Downer het die argumente van Schabir Shaik se regspan, waarom regter Hilary Squires se bevindings verkeerd was, aangeval en die hof genoop om na die tydlyn van gebeure te kyk.

In die omstrede brief word dr. Gavin Woods, voormalige voorsitter van Skoor en Nadeko-LP, meegedeel dat die spesiale ondersoekeenheid (SOE) onder leiding van regter Willem Heath nie deel sal wees van die wapenondersoek nie.

Zuma het die dokument onderteken, maar volgens hom het pres. Thabo Mbeki se kantoor dit geskryf en moes hy bloot sy handtekening daarop plaas.

Volgens Downer maak Zuma 'n te groot bohaai oor die feit dat iemand anders die brief geskryf het. "Of hy die brief geskryf of onderteken het maak niks saak nie. Hier is die wet aan ons kant. Jy kan omgekoop word deur bloot jou werk te doen."

Kopieë van die brief is aan Thint gestuur en regter John Heher wou by Downer weet of Zuma dit gedoen het om te wys hy ondersteun hulle. "Inderdaad. Hulle het die versekering (van sy ondersteuning) nodig gehad."

Die grootste deel van gister se betoë het gehandel oor die toelaatbaarheid van die berugte gekodeerde Franse faks en die gewig wat dit as bewysstuk dra.

Volgens adv. Jeremy Gauntlett, SC, Shaik se regsverteenwoordiger, is die faks niks meer as 'n "plat stuk papier nie". Dit is geskryf deur 'n bedrewe leuenaar (mnr. Alain Thétard van Thint) en bewys nié dat Zuma bewus was van omkopery nie.

Dit kan beteken dat Shaik Thint en Zuma bedrieg het deur geld vir homself te verkwansel onder die dekmantel van omkoopgeld vir Zuma.

Heher wou egter weet of die faks nie sê dat R500 000 aan iemand betaal is nie. "En wie dink jy is daardie persoon?"
Volgens Heher is die faks "nie só plat nie" en het dit 'n "spesifieke slaankrag" wat ondersteun word deur 'n reeks bewyse.

Shaik appelleer vandag teen Squires se batebeslagleggingsbevel ná sy skuldigbevinding.

Met erkenning aan Adriaan Basson en Beeld.