Publication: Beeld Issued: Date: 2006-07-03 Reporter: Adriaan Basson Reporter: Hendrik Schott

Nuwe Wapen-Bewerings kan Mbeki se Besoek aan Duitsland Oorskadu

 

Publication 

Beeld
Date 2006-07-03

Reporter

 Adriaan Basson, Hendrik Schott

Web Link

www.news24.com

 

Nuwe bewerings van korrupsie met die regering se multi-miljardrand-wapentransaksie dreig om pres. Thabo Mbeki se staatsbesoek aan Duitsland in ’n diplomatieke verleentheid te verander.

Mbeki vertrek Vrydag na Duitsland waar hy onder meer die eindstryd van die Wêreldbeker-sokkertoernooi sal bywoon en die logo van die 2010-toernooi in Suid-Afrika bekend sal stel.

Maar wat veronderstel is om ’n triomfantlike oomblik vir Suid-Afrika te wees, kan oorskadu word deur nuwe bewerings van omkopery met die omstrede R30 miljard-wapentransaksie.

Bewerings dat ’n Duitse fregatkonsortium (GFC) R137 miljoen se omkoopgeld aan Suid-Afrikaners betaal het om die R6,87 miljard-tender vir vier nuwe korvette te kry, maak opslae in die Duitse media.

Die weekblad Der Spiegel het gister onthul dat die kantore van ThyssenKrupp, Blohm + Voss, HDW en MAN Ferrostaal, wat almal deel vorm van die GFC, op 19 Junie deur die Duitse vervolgingsgesag deurgesoek is en daar beslag gelê is op bokse vol dokumente.

Luidens dié koerant kan Duitsland se wapenhandel met Suid-Afrika maar net die begin wees van een van die grootste skandale in jare met interne en eksterne politieke implikasies vir dié land.

“Die ondersoekers wéét dat daar met die verkoop van die korvette (aan Suid-Afrika) sogenaamde ‘noodsaaklike uitgawes’ – omkoopgeld deur Duitse maatskappye in die buiteland – afgeskryf is teen belastingvereistes, tot dié praktyk (in 1999) onwettig geword het in Duitsland. Hulle is egter nog nie seker wie die betalings goedgekeur het nie,” berig Der Spiegel.

Mbeki en me. Angela Merkel, Duitse kanselier, spreek Saterdag ’n mediakonferensie in Berlyn toe ná bilaterale gesprekke, maar daar word verwag dat die Suid-Afrikaanse staatshoof eerder gepeper sal word met vrae oor die nuutste hoofstuk van die wapenskandaal.

Luidens Der Spiegel het die Duitse owerhede reeds in 2001 ’n dokument uit Suid-Afrika ontvang met bewerings dat ’n hooggeplaaste Suid-Afrikaanse politikus *1 in 1999 miljoene rande via Switserland ontvang het vir sy aandeel in die toekenning van die GFC-kontrak.

Die nasionale vervolgingsgesag (NV) het gister gesê hy is nie deur sy Duitse eweknie gevra om te help met die ondersoek nie, maar Beeld het betroubaar verneem dat Duitsland reeds in 2002 met lede van die Skerpioene gepraat het. Dit is nie duidelik óf en watter inligting aan die Duitsers oorhandig is nie.

Tony Yengeni, voormalige hoofsweep van die ANC, en Schabir Shaik, mnr. Jacob Zuma se voormalige finansiële adviseur, is tot dusver die wapentransaksie se enigste slagoffers wat strafregtelik vervolg is. Zuma word op 31 Julie in die Pietermaritzburgse hooggeregshof van korrupsie aangekla. Die voormalige adjunkpresident word daarvan verdink dat hy R500 000 se omkoopgeld van die Franse wapenreus Thales aanvaar het.

Der Spiegel se ondersoek beklemtoon die vloot se eerste tenderproses vir korvette (Projek Sitron) in 1994 en dat Brittanje en Spanje tóé die enigste lande op die kortlys was.

“Dié besluit het nie langer as vier weke gestaan nie. Op sy besoek aan Duitsland in 1995 (as adjunkpresident) het Mbeki mnr. Klaus Kinkel, Duitse minister van buitelandse sake, en die GFC verras deur aan te kondig ‘die wedloop is nog oop’.”

Die DA en die OD het die regering gister wéér gevra om ’n ondersoek na die wapentransaksie in sy geheel te loods.

Met erkenning aan Adriaan Basson,Hendrik Schott en Beeld.


*1  Say it ain't so, Joe.