Publication: Die Burger
Issued:
Date: 2007-03-30
Reporter: Adriaan Basson
| Publication |
Die Burger
|
| Date |
2007-03-30
|
|
Reporter
|
Adriaan Basson |
|
Web Link
|
www.dieburger.com
|
KAAPSTAD.
– Die Skerpioene ondersoek nou ook aanklagte van geldverduistering en
geldwassery teen mnr. Jacob Zuma, ANC-onderleier.
Die ondersoek teen Zuma
en die wapenfirma Thint is vandeesweek verder uitgebrei toe die Pretoriase
hooggeregshof die Skerpioene toestemming gegee het om Brittanje se
wetstoepassingsowerhede by sy ondersoek te betrek.
Volgens ingeligtes
blyk dit nou ’n uitgemaakte saak te wees dat Zuma en Thint wéér deur die
nasionale vervolgingsgesag aangekla gaan word, moontlik eers volgende
jaar.
Die korrupsiesaak teen Zuma en Thint is verlede jaar in die
Pietermaritzburgse hooggeregshof van die rol geskrap.
Regter Ben du
Plessis het Donderdag ’n bevel uitgereik wat die Skerpioene magtig om die
Zuma-ondersoek na Brittanje uit te brei.
Dié aansoek is ondersteun deur
’n beëdigde verklaring van adv. Leonard McCarthy, hoof van die Skerpioene. Die
verklaring maak nuwe bewerings oor hoe Zuma se omkoopgeld glo deur die Britse
bankrekening van ’n prokureursfirma daar “gewas” is.
Mnr. Jurgen Kögl,
besturende direkteur van onder meer African Renaissance Holdings en
familievriend van pres. Thabo Mbeki, het voorheen erken dat hy geld aan Zuma
“geleen” het.
Maar volgens McCarthy was Kögl se verduidelikings oor die
aard van die betalings “onvolledig en onbevredigend”.
Nóú vra die
Skerpioene die Britse owerhede om die bankbestuurder van Barclays in Londen te
ondervra asook prokureurs van die Britse regsfirma Berwin Leighton Paisner
(BLP).
In ’n forensiese ondersoek deur die ouditeursfirma KPMG is bevind
dat R1 191 390,12 deur BLP se Britse Barclays-rekening aan Kögl se Cay Nominees
(in Suid-Afrika) betaal is – glo ten bate van Zuma.
En volgens McCarthy
is daar aanduidings dat dit ’n manier was om Thint se omkoopgeld aan Zuma te
verdoesel.
Die Skerpioene benodig Brittanje se samewerking om die ware
bron van die Kögl-betalings vas te stel, sę die Skerpioene-baas.
Thint is
die Suid-Afrikaanse filiaal van die Franse wapenreus Thales.
In die
Schabir Shaik-verhoor is bevind Shaik het gereël dat Zuma R500 000 per jaar van
Thales ontvang in ruil vir sy beskerming van dié firma teen ’n wapenondersoek en
vir die bevordering van hul belange in Suid-Afrika.
Daar is in
Augustus 2005 berig dat die Skerpioene moontlik hul laaste skakel (Kögl) gevind
het in die geldspoor van omkoopgeld wat volgens regter Hilary Squires aan Zuma
betaal is.
Dít was nadat die Skerpioene toegeslaan het op Kögl se kantoor
en huis.
In sy verklaring verwys McCarthy na ’n interne Thales-dokument waarin mnr. Alain Thétard,
voormalige hoof van Thint, na Kögl verwys as Thales se agent in
Suid-Afrika.
Kögl ontken dat hy ooit vir Thales
gewerk het.
Luidens dié dokument het me. Barbara Masekela, Suid-Afrika se
voormalige ambassadeur in Frankryk, bevestig dat Kögl “gemagtig is om sake
namens Thomson-CSF (Thales se vorige naam) te hanteer”.
Met erkenning aan Adriaan Basson en Die Burger.