Publication: Die Burger Issued: Date: 2007-04-18 Reporter: Adriaan Basson

Nuwe Vrae oor Mbeki en Thales

 

Publication 

Die Burger
Date

2007-04-18

Reporter

Adriaan Basson

Web Link

www.dieburger.com

 

Johannesburg – Daar is opnuut vrae oor pres. Thabo Mbeki se vergaderings met die Franse wapenfirma Thales, wat glo omkoopgeld aan mnr. Jacob Zuma betaal het.

Die ouditeursfirma KPMG het bevind me. Barbara Masekela, Suid-Afrika se voormalige ambassadeur in Frankryk wat luidens amptelike dokumente die vergaderings tussen Mbeki en Thales gereël het, is in ’n “direkte sakeverhouding” met die man wat die Skerpioene beweer Thales se agent was in Suid-Afrika.

Mnr. Jurgen Kögl, skatryk Johannesburgse makelaar en besturende direkteur van African Renaissance Holdings (ARH), was glo Thales se agent, maar hy het tot dusver enige verbintenis met dié wapenreus ontken.

Die Burger is in besit van ’n uittreksel uit KPMG se forensiese verslag wat voorberei is vir die staat se saak teen Zuma wat verlede jaar sou begin.

Dié uittreksel vorm deel van die Skerpioene se versoek vir wedersydse regsbystand aan Brittanje.

Luidens die verslag het Kögl nie vir net Zuma betaal nie, maar ook ander “regeringsamptenare en/of politici”.

Een van hulle is Masekela, wat tans Suid-Afrika se ambassadeur in Amerika is.

Haar naam kom voor in interne Thales-kommunikasie.

Daarluidens het sy glo in 1998 vergaderings tussen Mbeki, tóé adjunkpresident, en die Thales-base gereël.

Mbeki was voorsitter van die kabinetskomitee wat die omstrede wapentransaksie van R30 miljard moes bestuur.

Mbeki kon tot dusver nie die vergaderings met Thales onthou nie.

Die KPMG-verslag werp egter nuwe lig op Masekela se verbintenis met Kögl, wat op sy beurt ’n familievriend van Mbeki is.

Tot dusver was die enigste bewys van ’n verhouding tussen Masekela en Kögl ’n gekodeerde faks wat in 1999 deur mnr. Alain Thétard, voormalige hoof van Thales se Suid-Afrikaanse filiaal Thint, aan sy hoof in Parys gestuur is.

Daarin sę Thétard: “Mev. Masekela het bevestig dat Jurgen Koegl (sic) gemagtig is om alle sake namens Thomson-CSF (Thales se vorige naam) te hanteer en dat hy al hulle vertroue het.

“Barbara het ook verduidelik dat, weens etiese redes, omdat sy ambassadeur in Parys was tot 1998, dit nie vir haar moontlik is om in ’n direkte sakeverhouding met ’n Franse maatskappy te wees nie, wat haar verhouding met J. Koegl verduidelik.”

Nóú het KPMG bevind dat Masekela inderdaad ’n “direkte sakeverhouding” gehad het met “Kögl en/of maatskappye wat verbind word met Kögl”.

Die belangrikste maatskappy is Cay Nominees, waarvan Kögl die enigste direkteur en aandeelhouer is.

Cay Nominees se finansiële state vir 2005 wys glo dat R778 200 deur dié firma aan Masekela en Mabusele Investments, waarvan sy ’n direkteur is, betaal is.

Zuma is ook deur Cay Nominees betaal. Volgens KPMG het hy dié firma teen 30 Junie verlede jaar R2 068 896,23 geskuld.

Cay Nominees het ook betalings gemaak aan oudmin. Penuell Maduna en individue waarvan net die voorletters bekend is (TM, AP en MM).

Mbeki het vroeër die week ontken dat hy “TM” is, of dat hy geld van Kögl ontvang het.

Maduna het aan die Sunday Independent gesę sy R145 000 was ’n wettige uitbetaling van ’n legitieme belegging.

Kögl het alle navrae na sy prokureurs verwys wat nie wou reageer nie omdat die saak deel is van van ’n “uitstaande regsproses”.

Met erkenning aan Adriaan Basson en Die Burger.