Kaapstad. - Die baie rook oor die regering se omstrede wapentransaksie is só warm dat dit enige oomblik aan die brand kan slaan.

Só het dr. Richard Young, hoof van die Kaapse maatskappy C²I², gister gesê by navraag oor nuwe bewerings van korrupsie met die Suid-Afrikaanse wapentransaksie van R30 miljard in 1998.

Ook ander menings wat gekry is ná me. Patricia de Lille, OD-leier, se "onthullings" oor die wapentransaksie Dinsdag in die parlement is dat dié "korrupsie-rook" nie gaan verdwyn nie.

De Lille het in die Nasionale Vergadering "bevestig" die ANC, Nelson Mandela-kinderfonds en die Stigting vir Gemeenskapsontwikkeling het in 1999 elk R500 000 van die Duitse wapenmaatskappy Thyssen-Krupp gekry.

Mnr. Hennie van Vuuren, hoof van die Instituut vir Sekerheidstudie (ISS) se program oor korrupsie en staatsbestuur, meen solank die persepsie *1 voortleef dat die Nasionale Vervolgingsgesag (NVG) en ander agentskappe nie die gesag het om die beweerde korrupsie ten volle te ondersoek nie, of verhinder word om dit te doen, sal "die reuk van 'n skandaal" voortduur.

"Meer inligting kan in komende jare verwag word uit die Sweedse, Britse en Duitse ondersoeke na maatskappye in hul lande se beweerde medepligtigheid.

"Die Suid-Afrikaanse owerheid moes ook die saak ten volle laat ondersoek het sodat enkelinge hul name kan skoon kry en die botsing tussen staatsinstellings endkry."

Volgens Van Vuuren is die NVG, en veral die Skerpioene, met hul opgeboude kundigheid oor die wapentransaksie die regte instelling vir dié ondersoek.

Mnr. Pieter Groenewald, VF+-woordvoerder vir verdediging, sê die aantygings van korrupsie tas nie net net die beeld van die ANC en enkelinge aan nie, maar die hele plaaslike krygstuignywerheid.

"Die kontrakte kan nie meer gestop word nie en die meeste wapentuig is gelewer *2, maar die smet van korrupsie gaan voortleef."

Met erkenning aan Gert Coetzee en Die Burger.