Kaapstad - Die DA gaan stappe doen om te verseker wetstoepassers se harde werk en navorsing oor die regering se omstrede wapentransaksie gaan nie verlore nie.

Genl. Anwa Dramat, hoof van die direktoraat vir prioriteitsmisdaadondersoeke (die Valke), se aankondiging dat die ondersoek na die wapentransaksie laat vaar word, het die doodsklok vir die amptelike korrupsie-ondersoek gelui.

Te midde van groeiende protes dat die Valke besig is om moontlike korrupsie voortvloeiend uit die wapentransaksie toe te smeer het die DA nou ingegryp.

David Maynier, DA-LP en die party se woordvoerder oor verdediging, gaan die Wet op die Bevordering van Toegang tot Inligting gebruik om die dokumentasie voortspruitend uit die korrupsie-ondersoeke te bekom.

“Ons kan nie net terugsit en toelaat dat die Valke die ondersoek na die wapentransaksie in die doofpot stop nie. Ons het dus versoeke vir toegang tot inligting rakende alle dokumentasie oor die aankope van strategiese wapens ingedien,” het Maynier gesê.

“Die feit bly staan dat daar honderde kartondose vol dokumente en miljoene rekenaargeskepte dokumente oor die wapentransaksie in die Valke se besit is.

“Ons moet daardie dokumente bestudeer, want dis baie moontlik dat dit die grootste toesmeerdery van korrupsie in die geskiedenis van Suid-Afrika aan die lig sal bring,” het Maynier gesê.

Maynier het dus vyf aansoeke om toegang tot inligting ingedien, wat oor drie kwessies handel:
- Afsonderlike versoeke aan die departement van justisie en die die departement van polisie om alle dokumentasie rakende die wapentransaksie;
- Afsonderlike versoeke aan die departement van polisie en die departement van justisie om alle dokumentasie rakende die kansellering van die ondersoek na die wapentransaksie; en
- ’n Versoek aan die departement van justisie om alle dokumentasie rakende wedersydse internasionale bystand met die ondersoek na die wapentransaksie, veral die korrespondensie met Duitsland en Brittanje.

Dit is nie duidelik hoe lank die staatsdepartemente gaan neem om op die versoeke om dokumentasie te reageer nie.
 

Verwante skakels

• Wapenondersoek is 'dood'

• Het Valke onwettig opgetree?

• Valke ondersoek half miljard rand wapentransaksie