Dr. Richard Young

Die Seriti-kommissie se ondersoek na die wapen-skandaal is in die gedrang met belangrike getuies wat sê hulle weet nie of hulle die kommissie kan vertrou nie.

Dr. Richard Young, een van die onsuksesvolle tenderaars in die wapentransaksie en ’n belangrike getuie wat in Maart voor die kommissie moet verskyn, het gister aan Beeld gesê hy is nie bereid om te getuig voor ’n kommissie waarvan die integriteit onder verdenking is nie.

“Dit is moeilik genoeg om ’n verklikker te wees, maar wanneer die regter (Willie Seriti, voorsitter) nie vertrou kan word nie, kan ek nie getuig nie. Ek was van die begin af bekommerd en om nou dít te hoor... Ek vertrou dié mense nie.”

Die kommissie se integriteit is onder verdenking geplaas deur ondersoeker Norman Moabi, ’n prokureur en voormalige waarnemende regter van Pretoria, se bedankingsbrief waarin hy beweer die kommissie is nie deursigtig nie, bedryf ’n alternatiewe of “tweede agenda”, manipuleer inligting en kan nie vertrou word om die waarheid oor die wapenskandaal te ontbloot nie.

Young het sensitiewe en vertroulike dokumente in sy besit en vrees hy kan die kommissie nie met dié inligting vertrou nie. “Dit kan beteken dat ek myself blootstel... ”

Pres. Jacob Zuma het die Seriti-kommissie in 2011 geproklameer om die wapenskandaal, waarby van die land se toppolitici betrek word, te ondersoek.

Mac Maharaj, presidensiële woordvoerder, het gister gesê die presidensie is nie van plan om op grond van Moabi se bewerings op te tree nie.

“Dit lyk of dit ’n kwessie tussen ’n werknemer en die kommissie is. Ons gaan die kommissie nie mikrobestuur nie. Dit is ’n onafhanklike kommissie.”

Jeff Radebe, minister van justisie, is volgens Mthunzi Mhaga, sy woordvoerder, bewus van die bewerings, maar meen dis ’n saak wat die kommissie self moet uitklaar.

Terry Crawford-Browne, wapentransaksie-aktivis wat ook voor die kommissie moet getuig, het gesê Moabi se bewerings is kommerwekkend en dui op ’n toesmeerdery. “Dit is noodsaaklik dat die kommissie sy geloofwaardigheid herstel.”

David Maynier, DA-LP en getuie, het gesê die kommissie moet verduidelik wat aangaan.

Adv. Paul Hoffman, direkteur van die Instituut vir Verantwoordbaarheid in Suider-Afrika, is ook gevra om voor die kommissie te getuig.

Hy het gister gesê hoewel Seriti se integriteit onder verdenking is, beteken dit nie die hele kommissie moet afgeskryf word nie. “Seriti moet ’n behoorlike verduideliking gee. Hy ondermyn die kommissie se geloofwaardigheid.”

­Lawson Naidoo, woordvoerder van die Grondwet-waghond ­Casac, het gesê die kommissie se werk is ’n saak van enorme openbare belang.

“Ons hoop beslis dat die kommissie sy mandaat vervul en sy werk op ’n onpartydige en deursigtige manier doen sodat ons kan uitvind wat werklik met die wapentransaksie gebeur het.”

Regter Willie Seriti
Foto: Deaan Vivier