Foto: Herman Verwey

Daar is voorheen aangevoer pres. Jacob Zuma sou omkoopgeld van R500 000 per jaar van die Franse wapenmaatskappy Thales ontvang het.

’n Uitgelekte forensiese verslag verbind pres. Jacob Zuma nou vir die eerste keer met die Duitse ingenieursgroep MAN Ferrostaal, wat die kontrak vir drie duikbote in die omstrede wapentransaksie ontvang het.

Dié kontrak het sowat R8 miljard beloop.

’n Verslag deur die ouditgroep KPMG oor Zuma se finansies onthul dat Ferrostaal minstens R230 000 aan Zuma betaal het. Dit opper nuwe vrae oor Zuma se betrokkenheid by en invloed op die wapentransaksie van sowat R70 miljard.

Daar is voorheen aangevoer Zuma sou omkoopgeld van R500 000 per jaar van die Franse wapenmaatskappy Thales ontvang het. ’n Tender van R1,3 miljard is destyds aan ­Thales toegeken om die vloot se nuwe korvette met tegnologie toe te rus.

Regter Hilary Squires het bevind dat ’n gedeelte van Thales se omkoopgeld gebruik is om vir bouwerk by Zuma se private tuiste by Nkandla te betaal.

Mail & Guardian het die volle KPMG-verslag van 2006 gister op hul webblad gepubliseer.

Die ander omstrede onthulling is dat oudpres. Nelson Mandela R1 miljoen in Zuma se bankrekening betaal het kort nadat oudpres. Thabo Mbeki hom in 2005 as adjunkpresident afgedank het.

Die KPMG-oudit is gedoen tydens die destydse ondersoek na aanklagte van korrupsie teen Zuma wat in April 2009 laat vaar is. Dit gee ’n blik op Zuma se chaotiese geldsake en dat die R230 000 van Ferrostaal*1 klaarblyklik gebruik is om vir ’n Mitsubishi Pajero te betaal.

Die motorfinansieringslening was in daardie stadium agterstallig.

Luidens die verslag het WesBank die huurkoop van die Pajero toegestaan ten spyte daarvan dat die bank aangedui het Zuma se gedrag met ’n vorige leningsooreenkoms met die bank was “swak”.

City Press, Rapport se susterkoerant, het vrae aan Ferrostaal en Mac Maharaj, Zuma se woordvoerder, gestuur. Hulle het teen druktyd nog nie gereageer nie.

Ferrostaal se nuwe bestuur het verlede jaar vir Debevoise & Plimpton (D&P), ’n internasionale regsfirma, gevra om ’n ondersoek te doen na die bewerings van omkopery deur die maatskappy om internasionale wapentransaksies los te slaan.

Mail & Guardian het verlede jaar berig dat D&P bevind het meer as $40?miljoen (sowat R346 miljoen) is aan agente in Suid-Afrika betaal om die uitkoms van die duikboot-transaksie te beïnvloed.

Ferrostaal se hoofagente in Suid-Afrika was Tony Georgiadis, ’n kennis van oudpres. FW de Klerk (De Klerk het met Georgiadis se eksvrou, Elita, getrou) en Thabo Mbeki, en Tony Ellingford, ’n direkteur in die verdedigingsbedryf.

Daar is voorheen aangevoer pres. Jacob Zuma sou omkoopgeld van R500 000 per jaar van die Franse wapenmaatskappy Thales ontvang het.